"Փաշինեան Ռուսաստանի զինակից" Արա Պապյան:"Նիկոլն ինչ անում է, անում է Ռուսաստանի համար"
Կրկնում եմ նորից՝ Նիկոլն ինչ անում է, անում է Ռուսաստանի համար, անկախ այն բանից, ինչ է ինքը խոսում կամ ինչ են խոսում նրա մասին Ռուսաստանում։ Այդպես է եղել ամենասկզբից։ Դա պարզ դերաբաշխում է։
Ակնհայտ է, որ եթե Նիկոլին հաջողվի կաթողիկոսին գահընկեց անել, ապա Հայաստանեայց առաքելական սուրբ եկեղեցու Ռուսաստանի թեմերն անջատվելու են և հռչակեն առնվազն որոշակի ավտոկեֆալ (ինքնանկախ) գոյություն, ինչպես օրինակ Կ․Պոլսի պատրիարքությունն է։ Բնականաբար Ռուսական պետության անմիջական վերահսկողությամբ, ինչպես, օրինակ, Կ․Պոլսում է։
Հիմա հարց՝ Հայաստանեայց առաքելական սուրբ եկեղեցու Մոսկվայի պատրիարքության ծնունդը ու՞մ է ձեռնատու՝ մե՞զ, հայերի՞ս, թե Պուտինի՞ն ու թյուրքերի՞ն։
Իհարկե Նիկոլը դա կկոչի եկեղեցու բարենորոգում և ոմանք այդ կուտը կուտեն, կամ ցույց կտան, որ կերել են՝ որպեսզի պաշտոններն ու թալանը պահեն, բայց դրանից էությունը չի փոխվելու։ Ահավոր ու անշրջելի վնաս է հասցվելու հայ ինքնության հերթական կարևոր հիմնասյունին։
