Սեվ ուրբաթը Ուղափառ Հնչակեան տեսանկիւնէ

ՈՒԱՇԻՆԿԹԸՆԻ ՀԱՄԱՁԱՅՆԱԳԻՐԸ՝ ԱԶԳԱՅԻՆ ԱՐԺԱՆԱՊԱՏՒՈՒԹԵԱՆ ԵՒ ԳԵՐԻՇԽԱՆՈՒԹԵԱՆ ՀԱՇՒՈՅՆ ՑԱՒԱԼԻ ԶԻՋՈՒՄ

ԱՀԱՐՈՆ ՇԽՐՏԸՄԵԱՆ

Ուրբաթ, 8 օգոստոս 2025-ի երեկոյեան, Ուաշինկթընի Սպիտակ տան մէջ, Մ.Նահանգներու նախագահ Տօնալտ Թրամփի միջնորդութեամբ տեղի ունեցաւ եռակողմ հանդիպում՝ Հայաստանի վարչապետ Նիկոլ Փաշինեանի եւ Ազրպէյճանի նախագահ Իլհամ Ալիեւի մասնակցութեամբ:

Հանդիպումի աւարտին հրապարակուեցաւ «խաղաղութեան» հիմքերէն մեկնող համաձայնագիր: Երեւան զայն ներկայացուց «պատմական յաղթանակ»: Իրականութեան մէջ, տուեալ համաձայնագիրին բովանդակութիւնը կ՛ոտնակոխէ Հայաստանի տարածքային ամբողջականութիւնը, գերիշխանութիւնը, մեր ժողովուրդին ազգային արժանապաւութիւնը, եւ ռազմաքաղաքական վտանգաւոր գօտիի կը վերածէ հարաւային Կովկասը: Երեւան «յաղթանակ» կը ներկայացնէ համաձայնագիրին ստորագրութիւնը, սակայն վերլուծութիւնները ազգային պարտութիւն եւ ազգային շահերու նահանջ կը մատնանշեն:

Պատմական փորձը կը վկայէ, որ փոխադարձ արդարութեան եւ ազգային շահերու վրայ չհիմնուած համաձայնութիւններ, ուշ կամ կանուխ, նոր եւ երկարաժամկէտ հակամարտութիւններու դուռ կը բանան:

Տուեալ համաձայնագիրով Հայաստան փակուած համարեց Արցախի հարցին արդար կարգաւորումը: Այս լռութիւնը քաղաքական մակարդակի զիջումէ աւելի պատմական իրաւունքներէ հրաժարում մըն է: Հարցում մը՝ «յաղթանակ» կերտող իշխանութեան ներկայացուցիչները ի՜նչ խիղճով պիտի այցելեն Եռաբլուր:

Ազրպէյճան ստացաւ միջանցք, Ուաշինկթընի հետ կնքեց քարիւղի արտահանման եւ արատծման նոր պայմանագրութիւններ, ջնջուեցաւ անոր դէմ Ներկայացուցիչներու տան ռազմական օգնութիւն ստանալու թիւ 907 յօդուածին արգելքը:

Հայաստանի իշխանութիւնները տարածքային ամբողջականութեան փոխադարձ ճանաչումով եւ հաղորդակցութեան միջանցքի համաձայնութեամբ գոհացան, առանց հաշուի առնելու Հայաստանի ազգային-անվտանգութեան շահերը: Հայաստանի հարաւային գօտիով պիտի ստեղծուի միջազգային հաղորդակցութեան ճանապարհ, որուն շահագործման եւ հսկողութեան համար,Մ. Նահանգներ, «հայ-ամերիկեան» միացեալ անուան տակ, բացառիկ իրաւասութիւններ պիտի ստանայ յառաջիկայ 99 տարիներուն: Փաստօրէն Հայաստանէն որոշակի տարածք մը, երկարաժամկէտ կտրուածքով դուրս պիտի գայ անոր գերիշխանութենէն: Այս վտանգաւոր նախադէպ է:

Համաձայնագիրը մեծամասնութեամբ կը բաւարարէ մեր թշնամիներուն շահերը, քան Հայաստանի երկարաժամկէտ անվտանգային նպատակները: Այս պայմաններով ստորագրուած համաձայնագիր մը աւելի պարտադրուած զիջումներ կը յիշեցնէ, քան՝ յաղթանակ: Փաշինեանի փայփայած «Իրական Հայաստան»էն գրաւուած տարածութիւններուն մասին յիշատակութիւն անգամ չեղաւ:

Համաձայնագիրը, անոր ստորագրութիւնը, գործադրութիւնը տակաւին շատ ջուր կը վերցնեն...:

Ազրպէյճանի նախագահին յատուկ յանձնարարականներով դեսպան Էլչին Ամիրպեկով յաղթանակով գինովցողներուն յիշեցուց՝ համաձայնագիրը ստորագրելու եւ վաւերացնելու համար Հայաստան անհրաժեշտ է, որ փոփոխութեան ենթարկէ իր սահմանադրութիւնը...:

Սա պարզապէս յաւելեալ զիջումներ պարտադրելու պատգամ մըն է:

Հասկցողին շատ բան: